Year: 2022

பாடல் #1492: ஐந்தாம் தந்திரம் – 10. சக மார்க்கம் (இறைவன் தோழமையாக உடனிருந்து வழிகாட்டும் நெறி முறை)

ஆதார சோதனை யானாடி சுத்திகள்
மேதாதி யீரெண் கலந்தது விண்ணொளி
போதா லயத்துப் புலன்கர ணம்புந்தி
சாதா ரணங்கெட லாஞ்சக மார்கமே.

திருமந்திர ஓலைச் சுவடி எழுத்துக்கள்:

ஆதார சொதனை யானாடி சுததிகள்
மெதாதி யீரெண கலநதது விணணொளி
போதா லயததுப புலனகர ணமபுநதி
சாதா ரணஙகெட லாஞசக மாரகமெ.

சுவடி எழுத்துக்களை பதம் பிரித்தது:

ஆதார சோதனையால் நாடி சுத்திகள்
மேதை ஆதி ஈர் எண் கலந்தது விண் ஒளி
போத ஆலயத்து புலன் கரணம் புந்தி
சாதாரணம் கெடல் ஆம் சக மார்கமே.

பதப்பொருள்:

ஆதார (சாதனைகளின் மூலம் உடலுக்குள் இருக்கின்ற ஆறு ஆதார சக்கரங்களையும்) சோதனையால் (ஆராய்ச்சி செய்து அதன் வழியாக) நாடி (உடலுக்குள் இருக்கின்ற நாடிகளை) சுத்திகள் (சுத்தம் செய்து)
மேதை (உடல் இயக்கத்திற்கு காரணமாக இருக்கின்ற மேதைக் கலை) ஆதி (முதலாகிய) ஈர் (இரண்டும்) எண் (எட்டும் பெருக்கி வரும் மொத்தம் பதினாறு கலைகளோடு) கலந்தது (கலந்தது) விண் (விண்ணில் இருக்கின்ற) ஒளி (ஒளி வடிவமான இறை சக்தியானது)
போத (அறிவின்) ஆலயத்து (ஆலயமாக இருக்கின்ற உடலுக்குள் இருக்கின்ற) புலன் (ஐந்து புலன்களும்) கரணம் (நான்கு கரணங்களும்) புந்தி (புத்தியும்)
சாதாரணம் (தங்களின் இயல்பான செயல்களை) கெடல் (இழந்து இறை நிலையை) ஆம் (பெறுவதே) சக (இறைவனோடு தோழமையாக இருக்கின்ற) மார்கமே (வழி முறையாகும்).

விளக்கம்:

சாதனைகளின் மூலம் உடலுக்குள் இருக்கின்ற ஆறு ஆதார சக்கரங்களையும் ஆராய்ச்சி செய்து அதன் வழியாக உடலுக்குள் இருக்கின்ற நாடிகளை சுத்தம் செய்து உடல் இயக்கத்திற்கு காரணமாக இருக்கின்ற மேதைக் கலை முதலாகிய பதினாறு கலைகளோடு விண்ணில் இருக்கின்ற ஒளி வடிவமான இறை சக்தியானது கலந்தது. அதன் பிறகு அறிவின் ஆலயமாக இருக்கின்ற உடலுக்குள் இருக்கின்ற ஐந்து புலன்களும் நான்கு கரணங்களும் புத்தியும் தங்களின் இயல்பான செயல்களை இழந்து இறை நிலையை பெறுவதே இறைவனோடு தோழமையாக இருக்கின்ற வழி முறையாகும்.

உயிர்களின் உடலின் இயக்கத்திற்கு காரணமாக இருக்கின்ற பதினாறு கலைகள்:

1. மேதைக்கலை
2. அருக்கீசக்கலை
3. விடக்கலை
4. விந்துக்கலை
5. அர்த்தசந்திரன் கலை
6. நிரோதினிக்கலை
7. நாதக்கலை
8. நாதாந்தக்கலை
9. சக்திக்கலை
10. வியாபினிக்கலை
11. சமனைக்கலை
12. உன்மனைக்கலை
13. வியோமரூபினிக்கலை
14. அனந்தைக்கலை
15. அனாதைக்கலை
16. அனாசிருதைக்கலை

ஐந்து புலன்கள்:

1. கண் – பார்த்தல்
2. காது – கேட்டல்
3. மூக்கு – நுகர்தல்
4. வாய் – பேசுதல்
5. தோல் – தொடுதல்

நான்கு அந்தக்கரணங்கள்:

1. மனம்
2. புத்தி
3. சித்தம்
4. அகங்காரம்

பாடல் #1491: ஐந்தாம் தந்திரம் – 10. சக மார்க்கம் (இறைவன் தோழமையாக உடனிருந்து வழிகாட்டும் நெறி முறை)

யோகமும் போகமும் யோகியர் காகுமாம்
யோக சிவரூப முற்றிடு முள்ளத்தோர்
யோகம் புவியிற் புருடாதி சித்தியா
மாக மிரண்டு மழியாத யோகிக்கே.

திருமந்திர ஓலைச் சுவடி எழுத்துக்கள்:

யொகமும பொகமும யொகியர காகுமாம
யொக சிவரூப முறறிடு முளளததொர
யொகம புவியிற புருடாதி சிததியா
மாக மிரணடு மழியாத யொகிககெ.

சுவடி எழுத்துக்களை பதம் பிரித்தது:

யோகமும் போகமும் யோகியர்கு ஆகும் ஆம்
யோக சிவ ரூபம் உற்றிடும் உள்ளத்து ஓர்
யோகம் புவியில் புருட ஆதி சித்தி ஆம்
ஆகம் இரண்டும் அழியாத யோகிக்கே.

பதப்பொருள்:

யோகமும் (யோகமும்) போகமும் (அதனால் கிடைக்கின்ற பேரின்பமும்) யோகியர்கு (யோக சாதனை புரிகின்ற யோகியர்களுக்கே) ஆகும் (அவர்களின் தகுதிக்கு ஏற்றவாறு) ஆம் (கிடைக்கும்)
யோக (யோகத்தில்) சிவ (இறைவனின்) ரூபம் (ஒளி உருவத்தை) உற்றிடும் (தமக்குள்ளே தரிசிக்கின்ற) உள்ளத்து (யோகியர்களின் உள்ளத்திற்குள்) ஓர் (என்றும் இடைவிடாத இறை சிந்தனையாக இருக்கின்ற ஒரு)
யோகம் (யோகமே) புவியில் (இந்த உலகத்தில் இருக்கின்ற) புருட (யோகியர்களின் ஆன்மாவிற்கு) ஆதி (ஆதியாகிய பரமாத்மாவின்) சித்தி (அருள் சக்தியாக) ஆம் (கிடைக்கும்)
ஆகம் (அந்த அருள் சக்தியால் உடல் மனம்) இரண்டும் (ஆகிய இரண்டும்) அழியாத (என்றும் அழியாமல்) யோகிக்கே (இருக்கின்ற நிலையை யோகியர்கள் பெறுவார்கள்).

விளக்கம்:

யோகமும் அதனால் கிடைக்கின்ற பேரின்பமும் யோக சாதனை புரிகின்ற யோகியர்களுக்கே அவர்களின் தகுதிக்கு ஏற்றவாறு கிடைக்கும். யோகத்தில் இறைவனின் ஒளி உருவத்தை தமக்குள்ளே தரிசிக்கின்ற யோகியர்களின் உள்ளத்திற்குள் என்றும் இடைவிடாத இறை சிந்தனையாக இருக்கின்ற ஒரு யோகமே இந்த உலகத்தில் இருக்கின்ற யோகியர்களின் ஆன்மாவிற்கு ஆதியாகிய பரமாத்மாவின் அருள் சக்தியாக கிடைக்கும். அந்த அருள் சக்தியால் உடல் மனம் ஆகிய இரண்டும் என்றும் அழியாமல் இருக்கின்ற நிலையை யோகியர்கள் பெறுவார்கள்.

பாடல் #1490: ஐந்தாம் தந்திரம் – 10. சக மார்க்கம் (இறைவன் தோழமையாக உடனிருந்து வழிகாட்டும் நெறி முறை)

யோகமு மாதியி னுள்ளே யகலிடம்
யோக சமாதியி னுள்ளே யுளரொளி
யோக சமாதியி னுள்ளே யுளசத்தி
யோக சமாதி யுகந்தவர் சித்தரே.

திருமந்திர ஓலைச் சுவடி எழுத்துக்கள்:

யொகமு மாதியி னுளளெ யகலிடம
யொக சமாதியி னுளளெ யுளரொளி
யொக சமாதியி னுளளெ யுளசததி
யொக சமாதி யுகநதவர சிததரெ.

சுவடி எழுத்துக்களை பதம் பிரித்தது:

யோகமும் ஆதியின் உள்ளே அகல் இடம்
யோக சமாதியின் உள்ளே உளர் ஒளி
யோக சமாதியின் உள்ளே உள சத்தி
யோக சமாதி உகந்தவர் சித்தரே.

பதப்பொருள்:

யோகமும் (யோகம் என்று அறியப் படுகின்ற சாதனையானது) ஆதியின் (ஆதியாக இருக்கின்ற இறைவனின்) உள்ளே (உள்ளேயே அடங்கி) அகல் (அண்ட சராசரங்கள்) இடம் (அனைத்திலும் இறைவனோடு இடம் பெற்று இருக்கின்றது)
யோக (அந்த யோகத்தில்) சமாதியின் (ஆழ்ந்து இருக்கின்ற சமாதி நிலையில்) உள்ளே (சாதகருக்கு உள்ளே) உளர் (என்றும் நிலைபெற்று இருக்கின்ற) ஒளி (ஒளியாக இறைவன் இருக்கின்றான்)
யோக (யோகத்தில்) சமாதியின் (ஆழ்ந்து இருக்கின்ற சமாதி நிலையில்) உள்ளே (சாதகருக்கு உள்ளே) உள (இருக்கின்ற) சத்தி (இறைவனின் சக்தியை)
யோக (யோகத்தில்) சமாதியின் (ஆழ்ந்து இருக்கின்ற சமாதி நிலையில்) உகந்தவர் (இருந்து கொண்டே அனுபவித்துக் கொண்டு பேரின்பத்திலேயே திளைத்து இருக்கின்ற சாதகர்களே) சித்தரே (சித்தர்கள் ஆவார்கள்).

விளக்கம்:

யோகம் என்று அறியப் படுகின்ற சாதனையானது ஆதியாக இருக்கின்ற இறைவனின் உள்ளேயே அடங்கி அண்ட சராசரங்கள் அனைத்திலும் இறைவனோடு இடம் பெற்று இருக்கின்றது. அந்த யோகத்தில் ஆழ்ந்து இருக்கின்ற சமாதி நிலையில் சாதகருக்கு உள்ளே என்றும் நிலைபெற்று இருக்கின்ற ஒளியாக இறைவன் இருக்கின்றான். அந்த ஒளியாகிய இறைவனின் சக்தியை சமாதி நிலையில் இருந்து கொண்டே அனுபவித்துக் கொண்டு பேரின்பத்திலேயே திளைத்து இருக்கின்ற சாதகர்களே சித்தர்கள் ஆவார்கள்.

பாடல் #1489: ஐந்தாம் தந்திரம் – 10. சக மார்க்கம் (இறைவன் தோழமையாக உடனிருந்து வழிகாட்டும் நெறி முறை)

மருவுந் துவாதெச மார்கமு மில்லார்
குருவுஞ் சிவனுஞ் சமையமுங் கூடார்
வெருவுந் திருமகள் வீட்டில்லை யாகு
முருவுங் கிளையு மொருங்கிழப் போரே.

திருமந்திர ஓலைச் சுவடி எழுத்துக்கள்:

மருவுந துவாதெச மாரகமு மிலலார
குருவுஞ சிவனுஞ சமையமுங கூடார
வெருவுந திருமகள வீடடிலலை யாகு
முருவுங கிளையு மொருஙகிழப பொரெ.

சுவடி எழுத்துக்களை பதம் பிரித்தது:

மருவும் துவாதெச மார்கமும் இல்லார்
குருவும் சிவனும் சமையமும் கூடார்
வெருவும் திருமகள் வீட்டு இல்லை ஆகும்
உருவும் கிளையும் ஒருங்கு இழப்போரே.

பதப்பொருள்:

மருவும் (தியானத்தின் மூலம்) துவாதெச (தலைக்கு மேலே பன்னிரண்டு அங்குல தூரத்தில் இருக்கின்ற துவாதச வெளியில் இருக்கின்ற இறைவனை அறிகின்ற) மார்கமும் (யோக வழிமுறையை) இல்லார் (அறிந்து கொள்ளாதவர்களும்)
குருவும் (குருவின் மூலம் ஞானத்தை பெறாதவர்களும்) சிவனும் (இறைவன் மேல் பக்தி செய்யாதவர்களும்) சமையமும் (இறைவனை வழிபடும் தமது குல வழக்கத்தை) கூடார் (கைவிடுபவர்களும்)
வெருவும் (ஆகிய இவர்களுடன் சேர்ந்து இருப்பது வீண் என்று) திருமகள் (லட்சுமி தேவியும்) வீட்டு (அவர்களை விட்டு) இல்லை (வேண்டாம் என்று) ஆகும் (விலகி விடுவாள்)
உருவும் (அவர்களின் உடலும்) கிளையும் (உடலைச் சுற்றி இருக்கின்ற நன்மைகளும்) ஒருங்கு (அழிந்து) இழப்போரே (இழந்து விடுவார்கள்).

விளக்கம்:

தியானத்தின் மூலம் தலைக்கு மேலே பன்னிரண்டு அங்குல தூரத்தில் இருக்கின்ற துவாதச வெளியில் இருக்கின்ற இறைவனை அறிகின்ற யோக வழிமுறையை அறிந்து கொள்ளாதவர்களும் குருவின் மூலம் ஞானத்தை பெறாதவர்களும் இறைவன் மேல் பக்தி செய்யாதவர்களும் இறைவனை வழிபடும் தமது குல வழக்கத்தை கைவிடுபவர்களும் ஆகிய இவர்களுடன் சேர்ந்து இருப்பது வீண் என்று லட்சுமி தேவியும் அவர்களை விட்டு வேண்டாம் என்று விலகி விடுவாள். அவர்களின் உடலும் உடலைச் சுற்றி இருக்கின்ற நன்மைகளும் அழிந்து இழந்து விடுவார்கள்.

கருத்து:

உயர்ந்த மனித பிறவி என்பது இறைவனை அறிந்து கொண்டு அவனை அடைவதற்காக அருளப்பட்டது. இதில் இறைவனை அடையும் வழிகளாக பக்தி கர்மம் யோகம் ஞானம் ஆகிய நான்கு வழிகளை தோழமையுடன் உடனிருந்து இறைவன் அருளியிருந்தும் இது எதையுமே பின்பற்றாமல் ஆசையின் வழியில் செல்பவர்களை விட்டு தோழமையுடன் இருந்த இறைவன் விலகி நிற்பதால் அவர்களின் உயர்ந்த பிறவிக்கான நன்மைகள் அழிந்து போய் அடுத்த பிறவியில் கீழ் நிலை பிறவிக்கு சென்று விடுவார்கள்.

பாடல் #1488: ஐந்தாம் தந்திரம் – 10. சக மார்க்கம் (இறைவன் தோழமையாக உடனிருந்து வழிகாட்டும் நெறி முறை)

சன்மார்கந் தானே சகமார்க மானது
மன்மார்க மாமுத்தி சித்திக்கும் வைப்பதாம்
பின்மார்க மாவது பேராப் பிறந்திறந்
துன்மார்க ஞானத் துறுதியு மாமே.

திருமந்திர ஓலைச் சுவடி எழுத்துக்கள்:

சனமாரகந தானெ சகமாரக மானது
மனமாரக மாமுததி சிததிககும வைபபதாம
பினமாரக மாவது பெராப பிறநதிறந
துனமாரக ஞானத துறுதியு மாமெ.

சுவடி எழுத்துக்களை பதம் பிரித்தது:

சன் மார்கம் தானே சக மார்கம் ஆனது
மன் மார்கம் ஆம் முத்தி சித்திக்கும் வைப்பது ஆம்
பின் மார்கம் ஆவது பேரா பிறந்து இறந்து
உன் மார்க ஞானத்து உறுதியும் ஆமே.

பதப்பொருள்:

சன் (உண்மை) மார்கம் (வழியில் ஞானம் பெற்ற சாதகர்களுக்கு) தானே (தானாகவே) சக (இறைவன் தோழமையுடன்) மார்கம் (வழிகாட்டும்) ஆனது (நெறி முறையாக சக மார்கம் [தோழமை வழிமுறை] இருக்கின்றது)
மன் (இதுவே எப்போதும் நிலைத்து நிற்கின்ற) மார்கம் (வழியாக) ஆம் (இருந்து) முத்தி (முக்தி பேறு அடைவதற்கும்) சித்திக்கும் (நினைப்பதை எல்லாம்) வைப்பது (செயல்பட வைப்பது) ஆம் (ஆகவும் இருக்கின்றது)
பின் (இதற்கு நேர் எதிரான) மார்கம் (வழியில்) ஆவது (செல்பவர்கள்) பேரா (இடைவிடாமல்) பிறந்து (பிறவி எடுத்து) இறந்து (இறந்து மீண்டும் மீண்டும்)
உன் (மனம் செல்லுகின்ற) மார்க (வழியில் செல்லும் போதும் இறைவன் தோழமையுடன் மறைந்து இருந்து) ஞானத்து (ஒரு காலத்தில் உண்மை ஞானம்) உறுதியும் (உறுதியாக கிடைக்கும் படி) ஆமே (அருளுவார்).

விளக்கம்:

உண்மை வழியில் ஞானம் பெற்ற சாதகர்களுக்கு தானாகவே இறைவன் தோழமையுடன் வழிகாட்டும் நெறி முறையாக சக மார்கம் [தோழமை வழிமுறை] இருக்கின்றது. இதுவே எப்போதும் நிலைத்து நிற்கின்ற வழியாக இருந்து முக்தி பேறு அடைவதற்கும் நினைப்பதை எல்லாம் செயல்பட வைப்பது ஆகவும் இருக்கின்றது. இதற்கு நேர் எதிரான வழியில் செல்பவர்கள் இடைவிடாமல் பிறவி எடுத்து இறந்து மீண்டும் மீண்டும் மனம் செல்லுகின்ற வழியில் செல்லும் போதும் இறைவன் தோழமையுடன் மறைந்து இருந்து ஒரு காலத்தில் உண்மை ஞானம் உறுதியாக கிடைக்கும் படி அருளுவார்.

கருத்து:

உண்மை வழியில் ஞானம் பெற்றவர்களுக்கு இறைவன் தோழமையாக அருகிலேயே இருந்து நினைப்பது அனைத்தையும் செயல் படுத்துகின்றார். எந்த வழிமுறையையும் பின் பற்றாமல் மனம் போன போக்கில் வாழ்ந்து இறந்து மீண்டும் மீண்டும் பிறவி எடுத்தாலும் இறைவன் தோழமையாக மறைந்து இருந்து வழிகாட்டி ஒரு காலத்தில் ஞானம் பெறும் படி அருளுவார்.