பாடல் #1844: ஏழாம் தந்திரம் – 11. சிவ பூசை (அகத்திலும் புறத்திலும் சிவத்தை அறிந்து பூஜை செய்தல்)
பெருந்தன்மை நந்தி பிணக்கிரு ணேமி
யிருந்தன்மை யாலுமென் னெஞ்சிடங் கொள்ள
வருந்தன்மை யாளனை வானவர் தேவர்
தருந்தன்மை யாளனைத் தாங்கிநின் றேனே.
திருமந்திர ஓலைச் சுவடி எழுத்துக்கள்:
பெருநதனமை நநதி பிணககிரு ணெமி
யிருநதனமை யாலுமென னெஞசிடங கொளள
வருநதனமை யாளனை வானவர தெவர
தருநதனமை யாளனைத தாஙகிநின றெனெ.
சுவடி எழுத்துக்களை பதம் பிரித்தது:
பெரும் தன்மை நந்தி பிணக்கு இருள் நேமி
இரும் தன்மை ஆலும் என் நெஞ்சு இடம் கொள்ள
வரும் தன்மை ஆளனை வானவர் தேவர்
தரும் தன்மை ஆளனை தாங்கி நின்றேனே.
பதப்பொருள்:
பெரும் (மிகவும் பெருமைக்கு உரிய) தன்மை (இயல்பைக் கொண்ட) நந்தி (குருநாதனாகிய இறைவன்) பிணக்கு (உயிர்கள் தமது வினைகளை அனுபவிக்கும் படி பெருங்கருணை கொண்டு பாசத்தால் கட்டி) இருள் (மாயையாகிய இருள்) நேமி (சூழ்ந்து இருக்கும் படி பிறப்பித்தான்)
இரும் (அவன் எமக்குள் மறைந்து வீற்றிருக்கின்ற) தன்மை (மாபெரும் கருணையாகிய இயல்பை) ஆலும் (அவனருளால் யாம் அறிந்து கொண்டதால்) என் (எமது) நெஞ்சு (நெஞ்சத்தை) இடம் (அவன் விரும்பித் தங்குகின்ற இடமாக) கொள்ள (ஏற்றுக் கொள்ளும் படி செய்து)
வரும் (தானாகவே அடியவர் உள்ளத்திற்குள் விரும்பி வருகின்ற) தன்மை (இயல்பை கொண்டு) ஆளனை (அடியவர்களை அன்பால் ஆளுகின்றவனை) வானவர் (விண்ணுலகத்தில் இருக்கின்ற) தேவர் (தேவர்களுக்கும்)
தரும் (தமது பேரருளை தந்து அருளுகின்ற) தன்மை (இயல்பைக் கொண்டு) ஆளனை (அவர்களையும் ஆளுகின்றவனை) தாங்கி (எமது உள்ளத்திற்குள் ஆதாரமாக தாங்கி) நின்றேனே (நிற்கின்றேன் யாம்).
விளக்கம்:
அனைத்து உயிர்களும் போற்றுகின்ற மாபெரும் பெருமைக்கு உரியதாகிய இயல்பும், அடியவர்களின் உள்ளத்திற்குள் தாமே விரும்பி வருகின்ற இயல்பும், அவர்களைத் தமது பேரன்பினால் ஆட்கொண்டு அருளுகின்ற இயல்பும், விண்ணுலகத்தில் இருக்கின்ற தேவர்களுக்கும் தமது பேரருளைத் தந்து ஆட்கொள்ளுகின்ற இயல்பும் கொண்டு குருநாதனாக விளங்குகின்ற இறைவன், எமது வினைகளை அனுபவிக்கும் பொருட்டு எம்மை பாசத்தால் கட்டி, மாயையாகிய இருள் சூழ்ந்து இருக்கும் படி தமது பெருங்கருணையால் பிறவி எடுக்க செய்தான் என்றாலும் அவனது பேரருளாலேயே எமது உடலுக்குள் அவன் மறைந்து இருக்கின்ற இயல்பைக் காட்டி அருளினான். அதை அறிந்து கொண்டதால் யாமும் எமது நெஞ்சத்தை அவன் விரும்பி வீற்றிருக்கும் இடமாகச் செய்து அங்கே அவனை ஆதாரமாக தாங்கி நிற்கின்றேன்.
